اسلام آباد – 27 فيبروري (اي پي پي) وزيراعظم عمران خان چيو آهي ته پاڪستان جي خلاف فضائي حملي جي شڪل ۾ ڀارت جي غيرقانوني عاقبت ناانديش عسڪري مهم جوئي تي اسان جي جوابي ڪارروائي کي 2 سال مڪمل ٿيڻ تي آئون قوم کي مبارڪباد ۽ پنهنجي فوج کي سلام پيش ڪريان ٿو، اسان سدائين امن جو علم بلند ڪيو ۽ ڳالهين ذريعي سمورن تڪرارن جو حل ڪڍڻ جي لاءِ تيار رهون ٿا. پنهنجي ٽوئيٽ ۾ هن چيو ته هڪ بااعتماد ۽ فخر جوڳي قوم جي ناطي اسان پوري عزم ۽ استقلال سان پنهنجي مرضي جي وقت ۽ جڳهه تي جواب ڏنو. هندستان جي غيرذميواراڻي عسڪري شرانگيزي جي باوجود گرفتار ڀارتي هواباز واپس ڪري پاڪستان دنيا آڏو پنهنجي ذميواراڻي رويي جو اظهار ڪيو. اسان سدائين امن جو علم بلند ڪيو آهي ۽ ڳالهين ذريعي سمورن تڪرارن جو حل ڪڍڻ جي لاءِ تيار رهون ٿا. آئون ايل او سي جنگبندي جي بحالي جي آجيان ڪريان ٿو.
