اسلام آباد۔19دسمبر(اے پی پی):ملک اچ عام انتخابات 2024ء سانڳے امیدواراں دی طرفوں کاغذات نامزدگی جمع کراوݨ دا سلسلہ کل ٻدھ توں شروع تھیسی تے جیڑھا جو 22 دسمبر تئیں جاری رہسی ، الیکشن کمیشن قومی اتے صوبائی اسمبلیاں دے امیدواراں کوں کاغذات نامزدگی جمع کراوݨ متعلق ہدایت نامہ وی جاری کرݙتے۔الیکشن کمیشن دی طرفوں جاری کیتی ڳئی تفصیل موجب قومی اسمبلی دے کاغذات نامزدگی دے نال 30 ہزار روپے جݙاں جو صوبائی اسمبلیاں دے کاغذات نامزدگی دے نال 20 ہزار روپے ناقابل واپسی فیس جمع کرائی ویسی ۔ کاغذات نامزدگی سویلے ساڈھے 8 وڄے توں تریجھے پہر ساڈھے4 وڄے تئیں جمع کروائے ویسن ۔کاغذات نامزدگی دے نال نال تجویز اتے تائید کنندہ دے شناختی کارڈ دی مصدقہ نقل لاوݨی ہوسی ۔ امیدواراں کوں گزریل 3 سال دا انکم ٹیکس ریٹرن کاغذات نامزدگی دے نال جوڑݨا ہوسی ۔امیدوار پاسپورٹ دی مکمل کاپی دی نقل وی منسلک کریسی ۔امیدوار فیس نقد یا نیشنل بنک دی کہیں وی شاخ اچ جمع کرا سڳدے ۔ آندےعام انتخابات سانڳے تیاریاں زور شور نال جاری ہن ۔ انتخابی عملے دی ٹریننگ مکمل تھی ڳئی اے۔ امیدواراں دی طرفوں کاغذات نامزدگی 20 توں 22 دسمبر تئیں جمع کرائے ونڄ سڳسن جنھاں دی ابتدائی فہرست 23 دسمبر کوں جاری کیتی ویسی ۔ ریٹرننگ افسران دی طرفوں کاغذات نامزدگی دی جانچ پڑتال 24 توں 30 دسمبر تئیں تھی سڳسی جݙاں جو کاغذات نامزدگی منظور یا مسترد کیتے ونڄݨ دے خلاف اپیلاں 3 جنوری 2024 کوں دائر کیتیاں ونڄ سڳسن جنھاں تے اپیلٹ ٹربیونل دی طرفوں فیصلے 10 جنوری تئیں کیتے ویسن ۔ امیدواراں کوں انتخابی نشان دی الاٹمنٹ 13 جنوری کوں کیتیویسی جݙاں جو پولنگ 8 فروری 2024ء کوں تھیسی۔
