لاہور۔22دسمبر(اے پی پی) وفاقی وزیر سمندر پار پاکستانیز و ترقی انسانی وسائل ساجد حسین طوری آکھیے جو نویں پراجیکٹ اچ اوور سیز دا حق بݨدے ، اوور سیز دے مسئلے ٻہوں سارے ہن انہاں کوں حل کرݨ کیتے ساݙی وزارت ݙینھ رات کم کریندی پئی اے ۔ اے ڳالھ انہاں اوورسیز پاکستانیز فائونڈیشن(او پی ایف)ہائوسنگ سکیم فیز (ون) خیابان جناح اچ ہائی رائز کمرشل بلڈنگ دا سنگ بنیاد رکھݨ دی تقریب توں خطاب کریندے ہوئیں آکھی اے ۔ تقریب اچ ذوالفقار بدر، سیدہ فاطمہ حسن ، ڈاکٹر عالم شیر تےاو پی ایف دے افسران شرکت کیتی۔ وفاقی وزیرساجد حسین طوری آکھیے اوورسیز دے مسئلے حل کرݨ کیتے ساݙا عملہ ݙینھ رات کوشاں اے ،اوورسیز دے کیسز حل کرݨ کیتے سپیشل کورٹس دی سمری منظوری کیتے پارلیمنٹ بھیج ݙتی اے تاں جو 6مہینے اچ انہاں دے مسئلے حل تھی سڳن ۔ انہاں آکھیے او پی ایف دی سکیماں اچ اوورسیز کوں سرمایہ کاری کیتے موقع ݙتے ویسن تے ایں سلسلے اچ اوورسیز کوں این او سی ݙیوݨ کیتے ساریاں رکاوٹاں وی ہٹائیاں ویسن ۔ وفاقی وزیر آکھیے اوورسیز دے ٻالاں کوں پیش آندے تعلیمی مسئلے وی حل کیتے ویسن۔انہاں کوں ایچ ای سی دے ذریعے سکالرشپس اتے ٻاہرلے ملکاں اچ تعلیم دے موقع ݙیسوں جݙاں جو سکولاں تے کالجز اچ مقابلے دے امتحانات منعقد کیتے ویندے پئن ۔ انہاں آکھیے آذربائیجان، کوریا، رومانیہ و ٻئے ملکاں اچ اساں آپݨے ہنرمند لوکاں کوں بھیجیسوں ، آئی ٹی تے ٻئے شعبیں اچ ݙاہ لکھ لوکاں کوں ٻاہر بھیڄݨ دا ٹارگٹ اے،او پی ایف سکیماں اچ ترقیاتی کماں کوں جنوری2023 تئیں مکمل کرڳھدا ویسی ۔
