اسلام آباد۔14نومبر(اے پی پی)صدر مملکت ڈاکٹر عارف علوی آکھیے جو ورچوئل اتے آن لائن پلیٹ فارمز نال پاکستانی آرٹس، فیشن، ڈیزائن اتے ٹیکسٹائل مصنوعات کوں عالمی سطح تے سنڄاݨ ݙیوائی ونڄ سڳدی اے، جامعات فارغ التحصیل طلباء دی استعداد ودھاوݨ کیتے آن لائن و ورچوئل تعلیم تے توجہ ݙیون۔ اے ڳالھ انہاں پاکستان انسٹیٹیوٹ آف فیشن ڈیزائن لاہور دے دورے ویلھے آکھی۔ خاتون اول بیگم ثمینہ علوی وی انہاں دے نال ہن۔ صدر مملکت کوں ادارے اچ تعلیمی سرگرمیاں، کارکردگی اتے مختلف شعبیاں اچ تعلیمی سہولتاں تے بریفنگ ݙتی ڳئی۔ صدر آکھیا جو طلباء کوں معاشرے دا فعال حصہ ٻݨاوݨ کیتے مختصر مدتی کورسز کرائے ونڄن، ڄڳ دی مارکیٹ دی ضروریات دے مطابق تعلیم و تربیت کوں اڳونہا کیتا ونڄے، مختلف شعبیاں اچ ایسوسی ایٹ ڈگری ہولڈرز اتے سرٹیفیکیٹ ہولڈر افرادی قوت کوں ترجیح ݙتی ونڄے، جامعات طلبہ دی تعداد ودھاوݨ کیتے آئوٹ آف باکس سوچ اتے جدت اپناون۔
