اسلام آباد۔8جون (اے پی پی)وزیراعظم شہبازشریف ملک اچ سرمایہ کاری ودھاوݨ کیتے مختلف شعبیاں کیتے ٹاسک فورس ٻݨاوݨ، برآمدی صںعتاں دے خام مال تے سارے ٹیکس ختم کرݨ دی ہدایت کر ݙتی اے، اے ٹاسک فورس سیاحت، آئی ٹی، فارما، ای کامرس اتے زراعت تے ٻݨائی ویسی۔ بدھ کوں وزیراعظم آفس میڈیا ونگ توں جاری بیان موجب وزیراعظم شہباز شریف نال امریکن بزنس کونسل دے وفد اسلام آباد اچ ملاقات کیتی۔ ملاقات اچ فارما، فوڈ پراسیسنگ، آئی ٹی سیکٹر، ای کامرس، ریٹیل سیکٹر، ٹیکسٹائل، سپورٹس اتے لاجسٹکس دے شعبیاں دے نمائندے شریک تھیے۔ ملاقات اچ وفاقی وزراء سیّد نوید قمر، مخدوم مرتضی محمود، مریم اورنگزیب اتے متعلقہ اعلیٰ افسر وی شریک تھیے۔
