کراچی۔23اگست(اے پی پی):نگران وزیراعظم انوار الحق کاکڑ آکھیے جو پاک فوج، ضلعی انتظامیہ تے مقامی لوکاں بٹگرام چیئرلفٹ اچ پتھے ٻالاں کوں رل تے ریکسیو کیتے ،کہیں وی اوکھی صورت حال نال نبݨݨ کیتے اداریں دی استعداد کار کوں مزید ودھاوݨا ہوسی ،ملک توں انتہا پسندی تے دہشت گردی دے ناسور کوں منڈھوں مکا ݙیسوں ، اپݨے شہدا دیاں قربانیاں کوں کݙاہیں نہ بھلسوں ۔ اے ڳالھ انہاں میڈیا نال ڳالھ مہاڑ کریندے ہوئیں آکھی اے ۔وزیراعظم آکھیے پاک فوج،ضلعی انتظامیہ تے مقامی لوکاں رل تے پتھے ٻالاں کوں ریسکیو کیتا ، سکول دے ٻالاں جیڑھی بہادری ݙکھائی اے او تعریف دے قابل اے ،بٹگرام چیئرلفٹ آپریشن دی کامیابی تے وݙی خوشی تھئی اے ، انہاں آکھیے این ڈی ایم اے تے پی ڈی ایم اے دی استعدادکار اچ مزید بہتری گھن آوݨ دی لوڑھ اے پاک فوج دے ریسکیو آپریشن ساݙا سر فخر نال اُچا کرݙتا ، انہاں ٻالاں کوں ریسکیو کرݨ اصل مسئلہ ہئی، سوشل میڈیا تے ایں معاملے کوں غلط رنگ ݙیوݨ دی کوشش کیتی ڳئی ۔ انہاں آکھیے گزریل ݙینھ پاک فوج دے جوان شہید تھئن، جنگاں اچ کوئی فرد نی ، فوجاں لڑدن ، پاکستان کہیں صورت اچ دہشت گردی ، انتہا پسندی تے عدم برداشت دے خلاف سرجھکا نہ کریسی اساں ایندا ہر صورت اچ مقابلہ کریسوں ، اساں آپݨے گھر کوں آپݨے انداز نال چلیسوں ۔ ایں موقع تے گورنر سندھ کامران ٹیسوری تے نگران وفاقی وزیر اطلاعات ونشریات مرتضیٰ سولنگی وی موجود ہن ۔
