راولپنڈی۔6فروری(اے پی پی)وفاقی وزیر اطلاعات و نشریات چوہدری فواد حسین آکھیے جو کڄھ لوکاں وزیراعظم دے دورہ چین تے تنقید کیتی اے جیکوں باہمی اتے کثیر الجہتی دوریاں دے ہڄیاں دا وی پتہ نئیں، کل دی محفل اچ شہباز شریف اتے بلاول صاحب ماتم کریندے پئے ہن اتے مریم وی نال ہئی اتے انہاں دیاں چیکاں اسمان تئیں وینداں پن، اپوزیشن پنڄ فروری کوں ”یوم یکجہتی چوراں” ڈیکلیئر کیتے، عمران خان دے خلاف کوئی سازش کامیاب نہ تھیسی، اپوزیشن جتنیاں ٻھنوالیاں مارے ناکام ہی تھیوݨی اے، لانڳ مارچ کرݨ بلاول دی لیاقت نئیں، لانگ دے لفظ اچ جتنے ہجے ہین اتنے تاں انہاں کولو ڄݨے وی کائنی جو مارچ کرن، انہاں کوں بندے، اٹھ گھوڑے لوڑھ ہین تاں ساکوں ݙسن جو انہاں کوں خانہ پری کر ݙیووں۔ بیجنگ توں وطن ولݨ تے پریس کانفرنس کریندے ہوئے وزیر اطلاعات دا آکھݨ ہا جو وزیراعظم عمران خان دا دورہ چین ٻہوں کامیاب رہے، ایں دورے تے پٹݨ آلیاں دیاں چیکاں ݙسیندن جو وزیراعظم عمران خان کوں چین اچ کتنی پذیرائی ملی اے، چین آلی کار ساݙے کولو وی سرمائی کھیݙاں تے کم کرݨ دی لوڑھ اے جیندے کیتے ساݙے مشالی علاقے ٻہوں موافق ہین، ایں سانڳے چین وی ساݙا ہتھ ونݙیسی۔ وفاقی وزیر آکھیا جو اے اپوزیشن نئیں “علاقائی جماعتاں” ہین جیندا قومی سیاست اچ کوئی کردار کائنی، اپوزیشن 13 ویں واری لانگ مارچ دا سݙا ݙتے ٻھل اے پیچھو تے ݙیہدن تاں ڈرائیور اتے گارڈز دے علاوہ کوئی نال نئیں ݙسدا، جیویں پیپلز پارٹی دا پنجاب اچ کوئی پچھݨ آلا نہ ہوسی، ایویں شریف فیملی وی فیصلہ کیتے جو ساݙا سندھ اچ وی کوئی ہتھ نہ ہوسی، اے ہے انہاں دی سیاست، ڄݙاں چوری دے سارے راز ہکو ڄھیں ہوون تاں ملݨ ملاوݨ تاں ٻݨدے، عمران خان اتے پاکستان کوں اللہ تعالیٰ عزت ݙتی اے بھل اے جتنے سر مارن، اے عزت نئیں کھس سڳدے، انہاں دے حالات پہلے ہی پتلے ہین۔
