اسلام آباد۔31مئی(اے پی پی):وزیراعظم دی معاون خصوصی امور نوجوانان شزہ فاطمہ خواجہ آکھیے وزیراعظم یوتھ پروگرام دے تحت اعلیٰ تعلیمی اداریں دے باصلاحیت طالب علماں اچ اڄوکے سال میرٹ تے ھک لکھ لیپ ٹاپ تقسیم کیتے ویندے پئن ، ایں کیتے طالب علماں دی آن لائن رجسٹریشن دا عمل جاری اے، آندے بجٹ اچ نوجواناں کیتے کاروباری اتے زرعی قرضیں کیتے 100 ارب روپے مختص کرݨ دی تجویز اے،گزریل کجھ سالاں اچ نفرت انگیز سیاست دے نوجواناں تے منفی اثرات مرتب تھئن ، مختلف تعمیری پروگراماں دے ذریعے نوجواناں کوں مثبت سرگرمیاں دے پاسے راغب کرݨ کیتے اقدامات کریندے پیوں ، اڄوکے سال انوویشن ایوارڈ کیتے 3 ہزار درخواستاں ملیاں ،بوٹ کیمپس کیتے منتخب 500 ٻالاں اچوں 100 کوں نیشنل انوویشن ایوارڈ ݙیسوں ۔ اے ڳالھ انہاں اے پی پی کوں خصوصی انٹرویواچ آکھی اے ۔ انہاں آکھیے وزیراعظم یوتھ پروگرام دا آغاز 13مارچ 2013 اچ پاکستان مسلم لیگ (ن) دی حکومت کیتا ہئی ۔ ملک دی 70 فیصد آبادی 30 سال توں گھٹ عمر دے نینگراں تے مشتمل اےلہٰذا ایں پاسے خصوصی توجہ مرکوز کیتی ڳئی ۔انہاں آکھیے وزیراعظم یوتھ پروگرام دے تحت غیر رسمی تعلیم تے ہنر مندی تے توجہ ݙتی ڳئی اے ۔ گزریل 10 سال دے تجربات کوں سامݨے رکھیندے ہوئیں وزیراعظم محمد شہبازشریف دی موجودہ حکومت اچ ایں پروگرام اچ بہتری گھن آئی ڳئی اے ۔ ہنر دی تربیت تے خصوصی توجہ ݙتی ویندی پئی اے تاں جو ٻال تعلیم دے نال نال ہنروی سکھ سڳن ۔ انہاں آکھیے لیپ ٹاپ سکیم گزریل 4 سال توں بند ہئی ایں کوں ول شروع کیتا ڳئے ۔ شہبازشریف 2013 اچ پنجاب اچ لیپ ٹاپ سکیم دا اجراکیتا ہئی ۔ صرف وفاق اچ نوجوان طالب علماں کوں 2013 توں 2018 تئیں 5 لکھ لیپ ٹاپ ݙتے ڳئن۔انہاں آکھیے ایں ویلھے آئی ٹی دے شعبہ اچ انقلاب برپا اے۔ لیپ ٹاپ دا نوجواناں کیتے تعلیم اتے ذریعہ معاش دے حصول اچ اہم کردار اے۔ کورونا دے دوران نوجواناں لیپ ٹاپ دے ذریعے روزگار اتے تعلیمی سرگرمیاں جاری رکھیاں۔ انہاں آکھیے لیپ ٹاپ دی رجسٹریشن دا پورٹل کھلݨ دے بعد نوجواناں ایں دی تعریف کیتی اے ۔ اڄوکے سال اعلیٰ تعلیمی اداریں دے ھک لکھ باصلاحیت نینگراں اچ میرٹ تے لیپ ٹاپ تقسیم کیتے ویسن ۔ ھک سوال دے جواب اچ انہاں آکھیے آندے مالی سال اچ لیپ ٹاپ سکیم دا دائرہ کار ودھا ݙیسوں ۔ نوجوانوں کوں مفت لیپ ٹاپ ݙیوݨ دے نال نال سوکھیاں شرطاں تے ایں کیتے قرضیں ݙیوݨ دی تجویز اے۔وزیراعظم ہنر مند پروگرام دے تحت مختلف شعبیں اچ 70 فیصد ہائی ٹیک سکلز اتے 30 فیصد روایتی مہارتاں دی تربیت ݙتی ویندی پئی اے نینگراں کوں جدید ٹیکنالوجی دی تربیت ݙیوݨ کیتے کوشاں ہیسے ، ایں نصاب تے ادارہ جاتی صلاحیتاں اچ بہتری دی لوڑھ اے ۔
