اسلام آباد۔1دسمبر(اے پی پی):صدر مملکت ڈاکٹر عارف علوی دفاعی پیداوار دے شعبے اچ کارکردگی اتے پیداوار اچ ودھارے کیتے تحقیق و ترقی اتے جدت گھن آوݨ دی لوڑھ تے زور ݙیندے ہوئیں آکھیے جو پاکستان دے دفاعی پیداوار دے شعبے اچ ترقی دی وݙی صلاحیت موجود اے۔ ایوان صدر دے پریس ونگ توں جاری بیان موجب صدر مملکت اے ڳالھ خمیس کوں پاکستان آرڈیننس فیکٹریز واہ دے دورے ویلھے ڳالھ مہاڑ کریندے ہوئیں آکھی اے ۔ صدر مملکت کوں پاکستان دی دفاعی ضروریات پورا کرݨ اچ پاکستان آرڈیننس فیکٹریز دے کردار تے بریفنگ ݙتی ڳئی ۔ انہاں آکھیے جو جدید تے ابھردی ہوئی ٹیکنالوجی اپنا تے انسانی وسائل دی استعداد اچ مسلسل ودھارے توں ایں صلاحیت توں بھرپور فیدہ چاتا ونڄ سڳدے ۔ صدر آکھیے جو موجودہ منڈیاں اچ آپݨی پوزیشن مستحکم کرݨ کیتے سپلائی چین شعبے دی کارکردگی کوں ودھاوݨ ضروری اے ، پاکستانی دفاعی مصنوعات اعلیٰ معیار دی حامل، موثر، مختلف حالات اچ قابل اعتماد اتے گھٹ قیمت ہن ۔ صدر مملکت پاکستان دی دفاعی ضرورتاں کوں پورا کرݨ اچ پاکستان آرڈیننس فیکٹریز دے کردار دی تعریف کیتی ۔ انہاں افواج پاکستان تے ٻئے سکیورٹی ایجنسیز دی ضرورتاں کوں پورا کرݨ اچ فیکٹریز دے كردار دی تعریف کیتی۔ صدر مملکت آرڈیننس فیکٹریز دے مختلف حصیں دا دورہ کیتے جتھاں انہاں کوں پیداواری عمل تے بریفنگ ݙتی ڳئی۔ ڈاکٹر عارف علوی تیار کیتے ڳئے ڈسپلے تے موجود مختلف دفاعی مصنوعات اچ دلچسپی ڳھدی۔
