اسلام آباد۔30اپریل(اے پی پی):سپیکر قومی اسمبلی سردار ایاز صادق نال قطر دے سفیر علی مبارک علی عیسی الخاطر ملاقات کیتی جیں اچ پاک۔قطر تعلقات تے اطمینان دا اظہار اتے انہاں کوں مزید مستحکم بݨاوݨ دے عزم دا اعادہ کیتا ڳئے۔ ایں موقع تے سپیکر آکھیے پاکستان۔قطر نال آپݨے پراݨے برادرانہ تعلقات کوں اہمیت ݙیندے ۔ پاکستان تے قطر وچال برادرانہ تعلقات مذہب ، ثقافت ،تاریخ اتے سانجھے اعتماد و احترام دی تکڑی بنیاداں تے استوار ہن ۔ انہاں آکھیے ݙوطرفہ تعلقات کوں مزید تکڑا بݨاوݨ سانڳے پارلیمانی سفارتکاری اہم کردار ادا کر سڳدی اے۔ ݙوہیں بھرا ملکاں وچال پارلیمانی وفد دے تبادلے تے پارلیمانی فرینڈشپ گروپ وچال رابطے نال ݙوہیں قوماں اچ ہم آہنگی کوں ودھارا ملسی ۔سپیکر قومی اسمبلی دی قطر دی مجلس شوریٰ دے سپیکر حسن بن عبداللہ الغنیم کوں پارلیمانی وفد دے رلے پاکستان دورے دے دعوت ݙتی ۔ سپیکر آکھیے قطر دا پاکستان دی معاشی و اقتصادی ترقی سانڳے تعاون قابل ستائش اے۔پاکستان اچ ٻاہرلی سرمایہ کاری دے موقع موجود ہن جیں توں قطر دی سرمایہ کار فیدہ چا سڳدن ۔ قطر دے سفیر سپیکر قومی اسمبلی دے قطر دی عوام اتے حکومت سانڳے نیک تمناواں تے شکریہ ادا کیتے تے آکھیے قطر پاکستان نال آپݨے تعلقات کوں قدر دی نگاہ نال ݙیکھدے ۔ قطر دی عوام اتے حکومت ترقی یافتہ پاکستان ݙیکھݨ چاہندی اے ۔قطر دی تاجر برادری پاکستان اچ سرمایہ کاری اچ گھاٹی دلچسپی رکھیندی اے ۔سفیر آپݨی حکومت دی طرفوں پاکستان دی ترقی و خوشحالی سانڳے پورے تعاون دا یقین ݙیوائے۔
