اسلام آباد۔5 جنوری(اے پی پی)وزیراعظم عمران خان ہمہ جہت ترقی کیتے طویل المدت منصوبہ بندی دی اہمیت تےزور ݙیندے آکھیے جو ملک اچ ہر طبقے اتے علاقے کوں ہکو سویں ترقی ݙیوݨ دے نظام کوں رائڄ کرݨ دی پوری کوشش اچ ہیں، صحت کارڈ اتے مواصلاتی رابطیاں دی ترقی وݙی تبدیلی اے، اڳیں سڑکاں صرف کرپشن اتے مال ٻݨاوݨ کیتے ٻݨدیاں ہن بھل اساں ڄیڑھیاں سڑکاں ٻݨاعن او 2013 دے مقابلہ اچ 2021 اچ ڳھٹ لاگت دیاں اتے پہلے توں ݙوڑیاں ٻݨݨ، انہاں سڑکاں ٻݨاوݨ کیتے ارباں روپے دی بچت کیتی ڳئی اے اتے ایں پیسے نال ٻیاں ایہو ڄھیاں کئی سڑکاں ٻݨ سڳدن۔ اے ڳالھ انہاں ہکلہ ۔ڈی آئی خان موٹروے دی افتتاحی تقریب نال خطاب اچ آکھی۔ انہاں آکھیا جو ہکلہ ۔ ڈی آئی خان موٹروے نال ملک کوں وݙا فیدہ تھیسی، ہݨ ترقی صرف وݙے شہراں تئیں محدود نہ رہسی اتے ہر علاقے خاص کر پسماندہ علاقیاں کوں وی ہکو سویں ترقی ملسی، ملکی ترقی کیتے چنڳے منصوبہ بندی، ہکو سویں ترقی دے مواقع ضروری ہین، صحت، تعلیم دیاں بنیادی سہولتاں ݙیوݨ حکومت دی ترجیح اے، وزیر اعظم آکھیا جو صحت کارڈ ہک بہترین پروگرام اے، پنجاب دے ہر خاندان کوں مارچ تئیں ہیلتھ کارڈ مل ویسی اتے انہاں کوں 10 لکھ روپے تئیں دی ہیلتھ انشورنس ملسی، ہیلتھ کارڈ پاروں نجی شعبہ وی نویں ہسپتال ٻݨیسین۔ وزیراعظم آکھیے جو میں کݙاں دا آہدا پیاں جو کرپشن پاکستان دا سب توں وݙا مسئلہ اے، ڄݙاں کہیں ادارے توں کرپشن مک ونڄے تاں ملک و قوم کوں وݙا فیدہ تھیندے، ایندی مثال این ایچ اے، ساݙی حکومت دیاں سڑکاں اتے پچھلیاں ادوار دیاں سڑکاں دی لاگت ݙیکھو تاں صاف ݙسدے جو ماضی اچ کیویں کرپشن تھیندی رہی، ہک ہزار ارب روپیہ چوری تھئے، جیکر پیسہ چوری نہ تھیدا تاں ایندے نال ٻیاں ݙوڑیاں سڑکاں ٻݨ سڳدیاں ہن، اساں ای ٹینڈرنگ نال نظام شفاف ٻݨا ݙتے، ساݙی پوری کوشش اے جو اینڄھا نظام ٻݨاووں جیندے اچ کوئی طبقہ اتے علاقہ محروم نہ راہوے۔ ساݙی حکومت وی شفافیت اتے میرٹ دی پالیسی تے ٹردی پئی اے۔ انہاں آکھیا جو آندے ݙو سال اچ مغربی راہداری کوں اڳو تے ودھیسوں، سی پیک نال ملک اچ خوشحالی و ترقی دے رستے کھلسن۔
