اسلام آباد۔18دسمبر(اے پی پی) وفاقی وزیر آبی وسائل سید خورشید احمد شاہ آکھیے جو افراتفری اتے انتشار عمران خان دا ایجنڈا اے تے او حکومت اچ ہووے بھاویں اپوزیشن اچ آپݨے ایجنڈے تے کم جاری رکھیندے ، کوئی عام انسان صادق اتے امین دے خطاب دا ٻوجھ نی چا سڳدا تے عام انساناں تے ایندا اطلاق مناسب کائنی،صادق اتے امین دا لقب صرف انہاں کوں زیبا اے جنہاں توں اے منسوب اے، عقل دا تقاضا اے جو عمران خان خود ایں ٹائٹل توں دستبردار تھی ونڄے کیوں جو او کݙاہیں وی ایں لقب دے شایان شان ہئٰ نہ ہے تے نہ ہوسی۔ اتوار کوں آپݨے بیان اچ انہاں آکھیے عمران خان عوام کوں افراتفری اتے ملک کوں عدم استحکام دے پاسے سٹݨ چاہندے مگر او آپݨے مقصد اچ کݙاہیں کامیاب نہ تھیسی ۔ خورشید شاہ آکھیے عمران خان دی سیاست کوڑ تے مبنی اے تے کوڑ دا سکہ ہݨ زیادہ عرصہ نہ چلسی تے سچ دا سجھ ابھرسی ، عمران خان ماضی اچ لوکاں کوں کوڑے خواب ݙکھا تے اقتدار اچ آوݨ دا خواب تاں سچا کر ڳھدا مگر اقتدار اچ آتے اوں غریباں دی ترقی تے خوشحالی کیتے کوئی کم نی کیتا۔
