استنبول۔25نومبر (اے پی پی) وزیراعظم محمد شہباز شریف ترکیہ دے سرمایہ کاراں کوں پاکستان اچ سرمایہ کاری دی دعوت ݙیندے ہوئےآکھے جو ترکیہ نال ݙو پاسہ تجارت سودھے سارے شعبیاں اچ تعاون ودھاوݨ کیتے پرعزم ہیسے۔دہشت گردی دے خلاف پاکستان تے ترکیہ کٹھے ان ، عالمی سطح تےقیمتاں دے بہوں ودھارے پاروں ترقی پذیر ممالک ڈھیر متاثر تھیندے پئین ۔ اے ڳالھیں انہاں جمعے کوں ترکیہ دے صدر رجب طیب اردوان رلے سانجھی پریس کانفرنس توں خطاب کریندے ہوئے کیتا۔ وزیراعظم آکھیا جو او ترکیہ کوں آپدا ݙوجھا گھر سمجھدن ، صدر رجب طیب اردوان دی پرجوش میزبانی تے انتہائی مشکور ہیسے ۔ انھاں آکھیا جو پاکستان تے ترکیہ ہمیش ہر اوکھ اچ ہک ݙوجھے دی مدد کیتی اے ، دہشت گردی دے خلاف جنگ اچ پاکستان کوں جانی تے مالی نقصان پجے دہشت گردی دے خلاف پاکستان تے ترکیہ کٹھے ان ۔ انھاں آکھے جو ترکیہ نال ݙو طرفہ تجارت سمیت مختلف شعبیاں اچ تعاون کوں ودھاوݨ سانگے پرعزم ہیسے ۔ انھاں آکھیا جو عالمی سطح تے شئیاں دے مل اچ بہوں ودھارے پاروں ترقی پذیر ملک بہوں متاثر تھیندے پئین ۔ زیراعظم آکھے جو پاکستان چین کٹھے رل تے سی پیک منصوبے اگوں ودھیندا پئے ، سی پیک دی تکمیل نال خطہ دی ترقی تے خوشحالی دا نواں دور شروع تھیسی ۔ انھاں آکھیا جو ترک سرمایہ کاراں کوں پاکستان اچ سرمایہ کاری دی دعوت ݙینداں ، پاکستان اچ سرمایہ کاری دے وسیع مواقع موجود ان ۔ انھاں آکھیاجو پاکستان ترکیہ ہک جان ݙو قالب اتے مثالی بھرا ملک ان ۔ ترکیہ دے صدر رجب طیب اردوان پریس کانفرنس توں خطاب کریندے ہوئے آکھیا جو اج اساں سانجھی طور تے پی این ایس خیبر دی لانچنگ کیتی ، اساں پاکستان کٹھے رل تے بہوں بہوں منصوبے مکمل کیتن تے ڈوہیں ملکاں دے دیرینہ برادرانہ تعلقات ان ، دہشت گردی دے خلاف پاکستان دی ہر ممکن مدد کریسوں ، پاکستان دہشت گردی دے خلاف بھرپور اقدامات کیتن ۔ انھاں آکھیا جو اساں پاکستانی سیلاب متاثرہ بھیݨیں بھراواں دی آپدے وسوں ساری ممکن مدد کیتی اے تے ݙو پاسےدی تجارت اچ ودھارا اساڈی ترجیحات اچ شامل اے ، پاکستان ترکیہ ہر اوکھے ویلھے اچ ہک ݙوجھے دا ساتھ ڈتے ، ڈوہیں ملک عالمی فورماں اتے ہکو برابر مؤقف رکھیندن۔
