اسلام آباد۔18اپریل(اے پی پی) پارلیمنٹ دی پبلک اکاؤنٹس کمیٹی دا اجلاس منگل کوں پی اے سی دے چیئرمین نورعالم خان دی صدارت اچ پارلیمنٹ ہائوس اچ تھئے ۔ اجلاس اچ پی اے سی دے ارکان سودھے متعلقہ سرکاری اداریں دے افسران شرکت کیتی ۔ اجلاس اچ وزارت ہاؤسنگ اینڈ ورکس اتے وزارت بین رابطہ دے آڈٹ اعتراضات دا جائزہ ڳھدا ڳئے ۔ اجلاس دے آغازتے پی اے سی گن اینڈ کنٹری کلب اسلام آباد دا آڈٹ نہ ہووݨ دا نوٹس گھندے ہوئیں چیئرمین نور عالم خان آکھیے گن اینڈ کنٹری کلب دا آڈٹ کیوں نی کرایا ویندا پیا ۔ارباں روپے دے آڈٹ پیراز بݨ چکن ، قانون دی خلاف ورزی تھئی اے ۔ انہاں کلب دے آڈٹ کیتے نیب تے ایف آئی اے دی مدد گھنݨ دی ہدایت کریندے ہوئیں آکھیے جو میں اے آڈٹ پیراز ایف آئی اے نیب کوں انکوائری کیتے بھجویندا پیاں ۔ پی اے سی گن اینڈ کنٹری کلب دا سارا ریکارڈ قبضے اچ کرݨ تے گن اینڈ کنٹری کلب دے موجودہ سربراہ نعیم بخاری کوں وختی ہٹاوݨ دی ہدایت کیتی تے آکھیے جو نعیم بخاری توں گاݙی، دفتر سودھے ساری مراعات اتے سہولتاں واپس ڳھدیاں ونڄن ۔ مشاہد حسین سید آکھیے گن اینڈ کنٹری کلب 2002 اچ قائم کیتا ڳیا ہئی ، میں وی رکن ہاں۔ وزارت بین الصوبائی رابطہ دی طرفوں ݙسایا ڳئے جو ابتداء اچ اے کلب کائنی بلکہ ساؤتھ ایشین گیمز کیتے شوٹنگ رینج ہئی ۔بعد اچ اینکوں گن اینڈ کنٹری کلب بݨا ݙتا ڳیا۔جنرل عارف حسن گن اینڈ کنٹری کلب کیتے حکومت توں فنڈز ڳھدے ہن ۔ پی اے سی ایں سارے معالے دی عید دے بعد تحقیقات کرتے رپورٹ پیش کرݨ دی ہدایت کیتی ۔ سیکرٹری بین الصوبائی رابطہ گن اینڈ کنٹری کلب دا لیگل فریم ورک تیار تھی چکے ۔وفاقی کابینہ توں قوانین دی منظوری دے منتظر ہیسے۔
