اسلام آباد۔25جنوری (اے پی پی):الیکشن کمیشن پنجاب اتے خیبرپختونخوا اچ عام انتخابات کراوݨ کیتے پولنگ دی تاریخ دے اعلان دے حوالے نال ݙوہیں صوبیں دے گورنرز کوں خط بھیج ݙتن ، پنجاب اسمبلی دے انتخاب دی تاریخ 9 توں 13 اپریل جݙاں جو خیبر پختونخوا اسمبلی دے الیکشن 15 توں 17 اپریل دے دوران مقرر کیتے ونڄن ۔ الیکشن کمیشن دی طرفوں ٻدھ کوں گورنر پنجاب دے پرنسپل سیکرٹری دے ناں لکھیے ڳئے خط اچ آکھیے ڳئے جو آئین دے تحت کہیں وی اسمبلی دے تحلیل کیتے ونڄݨ دے 90 ݙٰینھ اچ عام انتخابات دا انعقاد آئینی تقاضہ اے۔ پنجاب اسمبلی دی تحلیل 14 جنوری 2023 کوں کیتی ڳئی جیں دے انتخابات 13 اپریل تئیں کرائے ونڄݨ لازمی ہن۔ پنجاب اچ عام انتخابات دے انعقاد کیتے پولنگ دی تاریخ 9 اپریل 13 اپریل تئیں مقرر کیتی ونڄے ایویں الیکشن کمیشن دی طرفوں پرنسپل سیکرٹری گورنرخیبر پختونخوا دے ناں لکھیے ڳئے خط اچ آکھیا ڳئے جو خیبر پختونخوا اسمبلی دی تحلیل 18 جنوری 2023 کوں تھئی جیں دے 90 ݙینھ 17 اپریل کوں پورے تھیندے پئن ۔ ایندے توں پہلے انتخابات داانعقاد آئینی تقاضہ اے ۔ ایں کیتے گورنر خیبر پختونخوا توں استدعا اے جو 15 توں 17 اپریل دے دوران دی تاریخ صوبے اچ عام انتخابات کیتے مقرر کراون۔
