اسلام آباد۔19فروری(اے پی پی):نگران وفاقی وزیر اطلاعات، نشریات و پارلیمانی امور مرتضیٰ سولنگی آکھیے جو الیکشن کمیشن دی طرفوں کامیاب امیدواراں دی فہرست جاری تھیوݨ دے بعد وزارت پارلیمانی امور قومی اسمبلی دا اجلاس سݙݨ دی سمری نگران وزیراعظم کوں بجھویسی تے صدر مملکت نال قومی اسمبلی دا اجلاس سݙݨ دی درخواست کیتی ویسی ۔ میڈیا نال ڳالھ مہاڑ کریندے ہوئیں وفاقی وزیر اطلاعات آکھیے جو نگران حکومت اپݨی ذمہ واری پوری کیتی اے ، کمشنر راولپنڈی دے معاملے تے اعلیٰ تحقیقاتی کمیٹی بݨی اے جݙاں جو الیکشن کمیشن وی ایں معاملے تے کاروائی کریندا پئے ۔ انہاں آکھیے اساکوں آپݨے اداریں تے نظام تے اعتماد کرݨا چاہیدے۔ انہاں آکھیے قانونی عمل چلدا پئے تاں انتظار کرݨا چاہیدے ۔ قومی اسمبلی دا اجلاس سݙݨ دے حوالے نال سوال دے جواب اچ وفاقی وزیر اطلاعات آکھیے جو آئین اتے قانون دے تحت جیویں ہی الیکشن کمیشن کامیاب امیدواراں دی فہرست جاری کریسی ، وزارت پارلیمانی امور قومی اسمبلی دا اجلاس سݙݨ دی سمری نگران وزیراعظم کوں بھجویسی تے صدر مملکت توں قومی اسمبلی دا اجلاس سݙݨ دی درخواست کیتی ویسی ۔
