اسلام آباد۔6جون(اے پی پی) وزیراعظم دے کوآرڈینیٹر معیشت وتوانائی بلال اظہرکیانی آکھیے مسلم لیگ ن دی حکومت دا بجٹ قومی ترجیحات تے توجہ ݙیندے ہوئیں ہمیشہ عوام دوست ہوندے ، آندے بجٹ اچ وی کمزور تے متوسط طبقے کوں ودھ توں ودھ ریلیف ، مہانگ اچ گھٹکی ، اقتصادی استحکام ،تجارت ، برآمدات تے سرمایہ کاری اچ ودھارا ، معاشی دستاویز بندی تے مالیاتی خسارے اچ کمی ساݙی ترجیح رہسی ، امید اے آئی ایم ایف کوں قائل کرݨ اچ کامیاب تھیسوں تے سٹاف سطح دامعاہدہ وختی طے تھی ویسی ، سی پیک ترقی اتے نمو دے سفردا منصوبہ اے، توانائی دے شعبہ اچ گردشی قرضہ اچ گھٹکی کیتے اقدامات کیتے ویندے پئن،ٻاہرلے ملکاں توں سستی توانائی گھنݨ کیتے کوشاں رہسوں ، ریاست کیتے ضروری اوکھے فیصلے کرتے سیاسی قیمت اداکیتی مگرملک کوں ݙیوالہ تھیوݨ توں بچایا ۔ ” اے پی پی “کوں خصوصی انٹرویو ݙیندے ہوئیں بلال اظہرکیانی آکھیے موجودہ حکومت جݙاں اقتدار سنبھالیا تاں اوکھی صورت حال دا سامݨا ہئی ،4 سال اچ عمران خان دی صورت اچ ناکام پراجیکٹ دے تجربہ توں پاکستان دی معاشی صورتحال اوکھی تھئی ، ݙوکروڑ لوک غربت دی لکیرتوں تلے چلیے ڳئے ، 60 لکھ توں ودھ لوک بے روزگارتھئے ، مہانگ اچ مسلسل ودھارا تھیندا رہیا ، کرسی توں رخصتی کوں یقینی ݙیکھدے ہوئیں ویندے ویندے انہاں آئی ایم ایف پروگرام نال روگردانی کیتی جیں توں ملک کوں معاشی طور تے ݙیوالہ تھیوݨ دی جاہ تے پڄاݙتا ، ایندے نال نال پاکستان ایں عرصے اچ سفارتی سطح تے کلھا رہیا ، او دوست ملک کوں ناراض کرچکیے ہن ، ساݙے کلیدی شراکت دارملک کوں کہیں نہ کہیں طریقے نال ناراض کیتا ڳیا ۃئی ، ایجھی صورتحال اچ موجودہ حکومت محمد نوازشریف اتے اتحادی جماعتاں دی مشاورت نال کم شروع کیتا ، آئی ایم ایف پروگرام کوں بحال کیتا ڳیا ، ریاست کیتے ضروری اوکھے فیصلے کیتے ڳئن جیں دی اساں سیاسی قیمت وی ادا کیتی مگرملک کوں ݙیوالہ توں بچایا ، حسابات جاریہ دے کھاتیں، مالیاتی اتےتجارتی خسارے تے قابو پاوݨ کیتے اقدامات کیتے ڳئے ، انہاں آکھیے اوکھے حالات اچ وی کمزورطبقے کوں ریلیف ݙیوݨ کیتے اقدامات کیتے ڳئے ،سستا تے مفت اٹا پروگرام شروع کیتا ڳیا تے بی آئی ایس پی دے بجٹ کوں ودھایا ڳیا ، موجودہ حکومت سفارتی تعلقات کوں وی بہتر کیتا، مسلم لیگ ن آپݨے گزریل دورحکومت اچ سرمایہ کاری تے کاروبار کیتے بہترین حالات ݙتے ہن ۔ ھک سوال دے ولدے اچ انہاں آکھیے حکومت پاکستان سمجھدی اے جو آئی ایم ایف نال جیڑھیاں شرطاں طے تھئن انہاں تے عمل تھیوے ،پاکستان تے آئی ایم ایف وچال مسلسل رابطہ اے، اے رابطے مختلف سطح تے برقرارہن، ڳالھ مہاڑ تھیندی پئی اے تے امید اے جو اساں آئی ایم ایف کوں قائل کر گھنسوں تے سٹاف سطح دامعاہدہ تھی ویسی ۔انہاں آکھیے جو سابق حکومت آئی ایم ایف دے نال پروگرام کیتے جیڑھیاں شرطاں قبول کیتیاں ہن او معیاری کائناں ہن ، اوں ویلھے دے سیکرٹری خزانہ وی ایندی مخالفت کیتی ہئی ، اساں وی واہ واہ کیتے پاپولر فیصلے کرسڳدوں مگر ایندا ملک اتےریاست کون ضیان تھیسی ، نویں مالی سال دے وفاقی بجٹ تے ڳالھ کریندے ہوئیں انہاں آکھیے مسلم لیگ ن دی حکومت دا بجٹ ہمیشہ عوام دوست ہوندے ، گزریل سال آوݨ آلے بدترین سیلاب توں متاثرہ علاقیں دی نویں سروں تعمیر تے بحالی کیتے وی اقدامات داسلسلہ جاری رہسی ، گھٹ توں گھٹ 1100 ارب روپے توں ودھ مالیت دے ترقیاتی منصوبے وی نویں مالی سال دے وفاقی بجٹ دا حصہ ہوسن، جیں اچ 950 ارب پی ایس ڈی پی اتے150 ارب پبلک پرائیوٹ پارٹنرشپ دے منصوبے ہن،پائیدارنمو،مہانگ مکاوݨ تے گھاٹیں کوں گھٹ کرݨ ساݙی اولین ترجیح ہوسی ۔انہاں آکھیے حکومت سمجھدی اے جو برآمدات ودھاوݨ ساݙی وختی لوڑھ اے ۔الیکشن دے بعد جݙاں ول حکومت اچ آسوں تاں لمبی مدت ڈھانچہ جاتی پروگرام شروع کریسوں ۔وزیراعظم دے رابطہ کار معیشت وتوانائی ݙسایا جو سی پیک دا منصوبہ ن لیگ حکومت دی ھک ٻہوں وݙی کامیابی ہئی ،سی پیک دے کئی گزریل 4 سالاں اچ التوا ءدا شکارتھئے جیں توں ݙوہیں ملکاں وچال تعلقات تے وی منفی اثرات پئن مگرموجودہ حکومت انہاں منصوبیں کوں بحال کیتے ۔توانائی دے شعبہ اچ اصلاحات متعلق سوال تے انہاں آکھیے گزریل حکومت بجلی دے شعبہ اچ 25 سو ارب روپے اتے گیس دے شعبہ اچ 1500 ارب روپے دا گردشی قرضہ چھوڑیا، ایں پوری مدت اچ ملک اچ ھک میگاواٹ بجلی نہ ودھارا نہ تھیا ، کوویڈ دے موقع تے پاکستان کوںایل این جی اتے توانائی دے لمبی مدت معاہدیں دا نادرموقع ملیا ہئی ، اوں ویلھے ایل این جی 4 ڈالرفی ایم ایم بی ٹی یو ملدی پئی ہئی مگر اینکوں نالائقی آکھوں یا فرنس آئل لابیز دا اثروسوخ ، اے پیشکش ٹھکرا ݙتی ڳئی ، انہاں آکھیے انشاء اللہ آندے انتخابات اچ کامیابی دے بعد ترقی تے خوشحالی دے ایں سفر دا ول آغاز تھیسی ۔
