اسلام آباد۔24جولائی (اے پی پی) وفاقی وزیر برائے نجکاری تے سرمایہ کاری بورڈ اتے مواصلات عبدالعلیم خان آکھیا جو معیشت دی مضبوطی کیتے خسارے آلے اداریاں دی نجکاری تھیندی پئی اے، سرمایہ کاری اتے معاشی لحاظ نال یورپی ملک اہمیت رکھیندن۔ کراچی توں سکھر موٹروے پہلی ترجیح اے تانجو پشاور تئیں روڈ نیٹ ورک پورا تھی سڳے۔ تجارت ودھاوݨ کیتے چین اتے وسط ایشیائی ملکاں تئیں روڈ نیٹ ورک پورا کریسوں۔ فرانس دے سفیر وفاقی وزیر نال نیشنل ڈے دے استقبالیے اچ شرکت تے شکریہ ادا کیتا۔ وفاقی وزیر آکھیا جو سرمایہ کاری اتے معاشی لحاظ نال یورپی ملک ٻہوں اہمیت رکھیندن۔ ملک دی معیشت مضبوط کرݨ کیتے خسارے آلے اداریاں دی نجکاری کریندے پئیوں۔ سفیر نکولس گیلے وفاقی وزیر عبدالعلیم خان نال ݙوپاسہ تعاون اتے فرانس ولوں پاکستان کیتے مختلف شعبیاں اچ دلچسپی ݙکھیندیں ہوئیں سانجھی کوششاں بارے ڳالھ مہاڑ کیتی۔ انہاں آکھیا جو جدید ٹیکنالوجی، دفاعی پیداوار اتے آئی ٹی اچ وی فرانس دی مہارت توں فیدہ چاتا ونڄ سڳدے۔ پاکستان دی مزمان نوازی توں لطف اندوز تھیندا پئیاں۔ وفاقی وزیر فرانسیسی کمپنیاں کوں مختلف شعبیاں اچ سرمایہ کاری اتے ݙوپاسہ تجارت دی دعوت ݙتی جڈانجو فرانسیسی سفیر وفاقی وزیر کوں فرانس دے دورے اتے بزنس ایسوسی ایشن نال ملاقات دی دعوت ݙتی۔
