اسلام آباد۔2اکتوبر (اے پی پی):وفاقی کابینہ آڈیو لیکس تے وݙا فیصلہ کریندیں ہوئیں سابق وزیراعظم عمران خان، انہاں دے ساتھی وزرا اتے اعظم خان دے خلاف قانونی کارروائی دی باضابطہ منظوری ݙی ݙتی اے۔ کابینہ ڈپلومیٹک سائفر بارے آڈیو لیک تے ایف آئی دے ذریعے تحقیقات اتے قانونی کاروائی دی منظوری ݙے ݙتی۔ کابینہ ڈویژن ولوں جاری تفصیلات موجب وفاقی کابینہ 30 ستمبر کوں عمران خان دی سائفر بارے آڈیو لیک تے کابینہ کمیٹی ٻݨائی ہئی، کابینہ کمیٹی پہلی اکتوبر کوں تھیوݨ آلے اجلاس اچ قانونی کاروائی دی سفارش کیتی، کابینہ کمیٹی دی سفارشات کوں سمری دی شکل اچ کابینہ دی منظوری کیتے پیش کیتا ڳیا، وفاقی کابینہ ’’سرکولیشن سمری‘‘ دے ذریعے کابینہ کمیٹی دی سفارشات دی منظوری ݙتی۔ کابینہ کمیٹی آپݨی سفارشات اچ آکھیا جو اے قومی سلامتی دا معاملہ اے جئیں دے قومی فائدے تے سنگین اثرات ہن، قانونی کاروائی لازمی اے، ایف آئی اے سینئر حکام تے مشتمل کمیٹی ٻݨاوے، ایف آئی اے انٹیلی جنس اداریاں توں وی افسراں اتے اہلکاراں کوں ٹیم اچ رَلا سڳدی اے، ایف آئی اے دی ٹیم جرم کرݨ آلیاں دے خلاف قانون دے مطابق کاروائی کرے۔ آڈیو لیکس اچ عمران خان، اعظم خان، شاہ محمود قریشی اتے اسد عمر سائفر تبدیل کرݨ بارے مشورہ کریندے پئے ہن۔
