اسلام آباد۔15مارچ (اے پی پی) وزیر خارجہ مخدوم شاہ محمود قریشی آکھیا جو او آئی سی وزرائے خارجہ کونسل اجلاس 22 اتے 23 مارچ کوں اسلام آباد اچ تھیسی، او آئی سی وزرائے خارجہ کونسل اجلاس اچ 48 ملکاں شریک تھیوݨ دی تصدیق کیتی اے جئیں دا مقصد مسلم ملکاں وچال اتحاد و یکجہتی، معاشی ترقی علاقائی امن تے استحکام دا فروغ اتے فلسطین و مقبوضہ جموں و کشمیر دی عوام کوں انصاف دی فراہمی اے، اسلام آباد اچ بھارتی ہائی کمیشن اتے بھارتی سفارتکار ایں اجلاس کوں سبوتاژ کرݨ کیتے ݙینھ رات کم کریندے پئن۔ کیونجو انہاں کوں علم اے جو پاکستان اجلاس اچ مسئلہ کشمیر کوں بھرپور انداز اچ اجاگر کریسی۔ کہیں کوں انہاں دے مذموم مقاصد اچ مددگار نی بݨݨا چاہیدا۔ بھارتی میزائل دے ”حادثاتی” طور تے چلݨ نال ݙو ایٹمی طاقتاں اچ جنگ چھڑ سڳدی ہئی اتے ایندے نتیجے تباہ کن تھی سڳدے ہن۔ نئی دہلی دی ہک پاسی تحقیقات ناکافی ہن۔ تحریک عدم اعتماد دا آئین کوں ݙیکھدیں ہوئیں سیاسی اتے جمہوری انداز اچ سامݨا کریسوں۔ میکوں یقین اےجو اے تحریک ناکام تھیسی۔ منگل کوں وزارت خارجہ اچ او آئی سی وزرائے خارجہ کونسل دے 48ویں اجلاس بارے پریس کانفرنس توں خطاب کریندیں ہوئیں انہاں آکھیا جو وزرائے خارجہ کونسل دے اجلاس دا موضوع شراکت داری برائے اتحاد، امن تے انصاف اے۔ اجلاس اچ سو دے نیڑے قرارداداں پیش تھیوݨ دی توقع اے جڈانجو ایں موقع تے کشمیر رابطہ گروپ دا اجلاس وی تھیسی۔
