اسلام آباد۔ 21 اگست(اے پی پی)صدر مملکت آصف علی زرداری نال چین دے وزیر خارجہ اتے سی پی سی دی مرکزی کمیٹی دے سیاسی بیورو دے رکن وانگ یی ایوان صدر اسلام آباد اچ ملاقات کیتی۔ ایں موقعے تے چین دے نائب وزیر خارجہ سن ویڈونگ اتے پاکستان اچ چین دے سفیر جینگ زائڈ مونگ وی موجود ہن۔ صدر مملکت پاکستان دی خودمختاری، علاقائی سالمیت، قومی ترقی اتے جموں و کشمیر تنازعہ تے چین دے اصولی اتے منصفانہ موقف سانگے مسلسل حمایت تے چین دا شکریہ ادا کیتا۔ صدر بیجنگ اتے چین دے صوبہ گانسو اچ حالیہ سیلاباں اچ قیمتی جاناں دے ضیان تے افسوس کیتا۔ صدر مملکت ایں سال دے شروع اچ آپݨے دورہ چین دا ذکر کریندے آکھیا جو ایں دوران انہاں دی صدر شی جن پنگ اتے چین دی اعلیٰ قیادت نال کامیاب ملاقاتاں تھئین۔ اے دورہ پاکستان۔چین آہنی بھائی چارے تے مضبوط اعتماد دا مظہر ہا۔ انہاں آکھیا جو 2026 پاکستان اتے چین وچال سفارتی تعلقات دے قیام دی 75ویں سالگرہ اے اتے پاکستان ایں اہم موقع کوں شاندار طریقے نال مناوݨ دی منصوبہ بندی کریندا پئے۔ انہاں آکھیا جو ڈوہیں مل?? ایں موقع کوں استعمال کریندے ہوئیں پاک۔چین دوستی دیاں بہترین روایتاں آپݨیاں نویں نسلاں تئیں منتقل کر سڳدن۔ صدر مملکت سی پیک کوں جیڑھا صدر شی جن پنگ دے فلیگ شپ بیلٹ اینڈ روڈ انیشی ایٹو دا حصہ اے، پاکستان اتے چین ڈوہاں سانگے بے پناہ سٹریٹجک اہمیت دا حامل قرار ݙتا۔ انہاں آکھیا جو سی پیک اساڈے باہمی وژن یعنی خطے اچ بہتر روابط، اقتصادی انضمام اتے پرامن ہمسائیگی ??ے خواب کوں سچ کرݨ دا ہک اہم حصہ اے۔ ایں موقع تے چین دے وزیر خارجہ وانگ یی آکھیا جو چین اتے پاکستان دی دوستی نسلاں تئیں قائم رہی اے جیڑھی باہمی خیر سگالی، اعتماد اتے مضبوط سٹریٹجک شراکت داری تے مبنی اے۔ انہاں آکھیا جو صدر شی جن پنگ دا وژن اے جو پاکستان اتے چین دا مستقبل مشترکہ اے اتے ڈوہاں ملکاں دے عوام کوں ہک ݙوجھے دے نیڑے گھن آوݨ سانگے کم تھیوݨا چاہیدے۔ انہاں آکھیا جو چین، اہم موقعاں تے پاکستان دی حمایت کوں قدر دی نال ݙیھدے۔ ڈوہیں ملکاں وچال ݙو طرفہ تعاون اتے علاقائی سلامتی دے معاملیاں تے وی ڳالھ تھئی۔ ایں موقعے تے نائب وزیراعظم اتے وزیر خارجہ سینیٹر محمد اسحاق ڈار، وفاقی وزیر برائے منصوبہ بندی، ترقی و خصوصی اقدامات احسن اقبال، وفاقی وزیر داخلہ و انسداد منشیات سینیٹر محسن رضا نقوی، چیئرمین پیپلز پارٹی پارلیمنٹرینز بلاول بھٹو زرداری، رکن قومی اسمبلی حنا ربانی کھر، صدر مملکت دے ترجمان مرتضیٰ سولنگی، سیکرٹری خارجہ اتے پاکستان دے سفیر برائے چین وی موجود ہن۔
