اسلام آباد ۔27ستمبر(اے پی پی):نگران وفاقی وزیر نیشنل فوڈ سیکیورٹی اینڈ ریسرچ ڈاکٹر کوثر عبداللہ ملک آکھیے زراعت، لائیو سٹاک اتے فشریز دے شعبے اچ پاکستانی ماہرین دی صلاحیت اچ ودھارے کیتے ایف اے او نال تعاون دی لوڑھ اے ۔ ایف اے او اتے پاکستان وچال خوراک دی کمی اتے پائیدار زرعی پیداوار گھنݨ کیتے موجودہ تعاون تسلی بخش اے۔اے ڳالھ انہاں پاکستان اچ فوڈ اینڈ ایگریکلچر آرگنائزیشن دی نمائندہ فلورنس رولے نال ملاقات اچ آکھی اے ۔ ڈاکٹر کوثر عبداللہ ملک پاکستان اچ غذائی تحفظ اتے زرعی پیداوار یقینی بݨاوݨ کیتے حکومت پاکستان اتے اقوام متحدہ دے فوڈ اینڈ ایگریکلچر آرگنائزیشن وچال پراݨی شراکت دی تعریف کیتی تے آکھیے بیف سیکٹر اچ ایف ایم ڈی دی انتظامی حکمت عملی اچ وی تعاون دی لوڑھ اے ۔ ایں موقع تے فوڈ اینڈ ایگریکلچر آرگنائزیشن دی نمائندہ فلورنس رولے حکومت پاکستان نال قومی اتے صوبائی سطح تے کم کرݨ کیتے ایف اے او دے جاری عزم دا اظہار کیتا۔انہاں آکھیے زراعت دے شعبے اتے خوراک دے نظام اچ جدت، تبدیلی تے ڈیجیٹلائزیشن گھن آوݨ کیتے ایف اے او مدد ݙیسی ۔ فلورنس رولے ودھدیاں مقامی ضرورتاں کوں پورا کرݨ سانگے ملک اچ سویا بین دی پیداوار کوں چںڳاں کرݨ تے وزارت دی مدد کرݨ تے اتفاق کیتا۔فلورنس رولے آکھیے ایف اے او پہلے ہی ایف ایم ڈی تے کم کریندا پئے تے وختی ایں تے عمل درآمد کیتے وزارت نیشنل فوڈ سیکیورٹی اینڈ ریسرچ نال حکمت عملی بݨائی ویسی ۔
