لاہور۔19ستمبر (اے پی پی) وفاقی وزیر اطلاعات و نشریات عطا اللہ تارڑ دی والدہ ساجدہ فاروق تارڑ پاکستان اتے سعودی عرب وچال طے تھیوݨ آلے تاریخی دفاعی معاہدے کوں چنڳاں قرار ݙتے۔ آپݨے ہک بیان اچ انہاں آکھیا جو اے معاہدہ نہ صرف ݙوہیں بھرا ملکاں دے تعلقات کوں نویں جہت ݙیسی بلکہ خطے اچ امن، ترقی اتے استحکام تے وی اثرات چھوڑیسی۔ ساجدہ فاروق تارڑ آکھیا جو پاکستان اتے سعودی عرب دے تعلقات دیاں پاڑاں ٻہوں تکڑے ہن اتے اے تعلقات صرف حکومتی سطح تئیں محدود نی بلکہ عوامی دلاں دی دھڑکن اچ وی رلیاں ہن۔ انہاں آکھیا جو دفاعی تعاون دا اے معاہدہ ایں ڳالھ دی نشانی اے جو ݙوہیں ملک اوکھے حالات اچ ہک ݙوجھے دے رَلے کھڑن۔ انہاں مزید آکھیا جو وزیراعظم پاکستان دی قیادت اچ تھیوݨ آلا اے معاہدہ قومی سلامتی دے تقاضیں دے عین موجب اے اتے ایں نال پاکستان دے دفاع کوں نویں طاقت ملسی۔ انہاں موجب سعودی عرب ہمیشہ پاکستان دا ساتھ ݙتے اتے اے معاہدہ ایں پراݨی یاری کوں مزید گھاٹا اتے تکڑا کریسی۔ ساجدہ فاروق تارڑ آکھیا جو عوامی سطح تے وی ایں معاہدے کوں ٻہوں پذیرائی ملدی پئی اے اتے اے ڳالھ خوش آئند اے جو مسیتاں ، مدرسیں اتے عوامی اجتماعات اچ ایں تے خوشی دا اظہار کیتا ویندا پئے۔ انہاں آکھیا جو اے ترقی صرف دفاعی میدان تئیں محدود نہ رہسی بلکہ ایں دے فیدے معاشی، سفارتی اتے عوامی سطح تے وی ظاہر تھیسن۔ انہاں دعا کیتی جو اللہ تعالیٰ ایں معاہدے کوں ݙوہیں ملکاں اتے پوری امتِ مسلمہ دے اتحاد اتے ترقی دا ذریعہ بݨاوے اتے پاکستان و سعودی عرب دے عوام وچال اخوت تے بھرپی دے رشتے کوں مزید تکڑا کرے۔
