اسلام آباد۔1اکتوبر (اے پی پی):وزیراعظم عمران خان ہدایت کیتی اے جو نمک اتے دواسازی دے شعبیں اچ برآمدات اچ تنوع دی مکمل صلاحیت توں فیدہ چاوݨ کیتے سارے ضروری اقدامات چاتے ونڄن ۔ وزیراعظم آفس دے میڈیا ونگ توں جاری بیان موجب اے ہدایت انہاں جمعہ کوں نیشنل ایکسپورٹ ڈویلپمنٹ بورڈ دے اجلاس دی صدارت کریندے ہوئیں ݙتی اے ۔اجلاس اچ وزیر خزانہ شوکت فیاض ترین ، وزیر صنعت و پیداوار مخدوم خسرو بختیار ، مشیر تجارت و سرمایہ کاری عبدالرزاق داؤد ، معاونینِ خصوصی ڈاکٹر فیصل سلطان، ڈاکٹر شہباز گل ،چیف ایگزیکٹیو آفیسر ڈرگ ریگولیٹری اتھارٹی آف پاکستان ( ڈریپ) عاصم رؤف ، دواسازی اتے نمک دے شعبیں دے نمائندے اتے متعلقہ اعلی افسران شرکت کیتی۔ وزیراعظم کوں خاص طور تے نمک اتے دواسازی دے شعبیں اچ برآمدات اچ تنوع دے امکانات بارے ݙسایا ڳیا ۔ وزیراعظم کوں ݙسایا ڳئے جو پاکستان ایں لحاظ توں خوش قسمت اے جو اتھاں ہر قسم دا نمک دستیاب اے۔ انہاں اچ چٹانی نمک ، سمندری نمک اتے جھیلاں توں حاصل شدہ نمک شامل ہن۔ 6.2 بلین ٹن دے مجموعی ذخائر دے نال کھیوڑہ سالٹ مائن دنیا اچ نمک دی ݙوجھی وݙی کان اے۔ پاکستان کنے 1050 کلومیٹر طویل ساحلی پٹی دے نال سمندری نمک دے وسیع ذخائر وی ہن۔ 350 ملین ٹن عالمی نمک دی کھپت دا تقریباً 60 فیصد کیمیائی صنعت بݨیندی اے ۔ پاکستان دی سالانہ نمک دی پیداوار 4 ملین ٹن اے ، جݙاں جو ہر سال صرف 3 لکھ ٹن برآمد کیتا ویندا پئے ۔ وزیراعظم ایں ڳال تے وی زور ݙتے جو کاروباری برادری کوں ودھ توں ودھ ویلیو ایڈیشن دے حصول کیتے جدید ٹیکنالوجی اپناوݨی چاہیدی اے ۔
